माझा समाज

असा कसा रे समाज  माझा ?
मुलगा झाला म्हणून उत्सव साजरा करणारा तर मुलीला गर्भात मारणारा
आणि स्त्री भ्रूण हत्या रोखा  म्हणून जनजागृती करत फिरणारा  …
असा कसा रे समाज  माझा ?

आईला देव मानणारा आणि तिलाच देवळात जाऊ न देणारा
स्त्री ची पूजा करणारा आणि तिलाच विटाळ समजणारा
असा कसा रे समाज  माझा ?

दाखल्यावर जात लिहणारा आणि शाळेत सर्व धर्म समभाव  शिकवणारा 

आणि भारतीय माझे बांधव म्हणत जातीवादाला बळी पडणारा 

असा कसा रे समाज  माझा ?

मुलाने मुलगी पळवून आणली तर अभिमानाने सांगणारा
आणि स्व:ताची मुलगी पळून गेली म्हणून तिला वाळीत टाकणारा
असा कसा रे समाज  माझा ?

स्त्री स्वतंत्र आहे म्हणत भावनांच्या बंधात तिला जखडणारा,
स्त्री सुरक्षेसाठी झगडणारा आणि तिच्यावरच अत्याचार करणारा 

असा कसा रे समाज  माझा ?

जिवंतपणी अवहेलना करणारा आणि मेल्यावर गोडवे गाणारा 
Smart जगात वावरतानाही अंधश्रद्धेला बळी पडणारा
असा कसा रे समाज  माझा ?